ässgwohnätä und anderi churzgschichtä

• ässgwohnätä in Paraguay

In Argentiniä sind alli immer spoot am ässä gsii, am 7ni is Reschti z'gaah hed oft gheissä es isch no gar nid offä, oder d'Kuchi miech no nüd warms - Snacks und Salat gaeb's. So han mer agwoehnt gha spaat fuer mich - früeh für d'Argentinier - um die 8 gross z'ässä mit emä guetä Z'morgä und öbis chliises am Namitag.

Jetzt in Asuncion isch am Aabig ab dä 6ni nur no wenig loos und was am 8 no offe hed isch entweder tüür, dä Burger King oder en Supermärt. Die Reschtis wo offä händ hend typischerwiis kei bis wenig Gescht. Bin tüür go ässä - und na ja  es isch na ja gsii.

Am Mittig hed's tuusigi vo Ort zum ässä - wohl für all die wo im Zentrum schaffed und usserhalb wohned. Also bin i hüt am Mittag gross, guet und billig (3 CHF) go ässä gsii und mach's Aabigässä chlii. Han am Mittig wohl s'erscht mal im mim Läbä en Frau gsee wo mit beschter Luscht ihrä Tällär mit Pouletbäi und anderem Fleisch vollgstopf hed - bin einä vo dä wenige gsii wo ä Salat gässä hed...

---

• Belüüchtigskonzept und Gebäuderuinä, Parlamänt und Slum

Asuncion sig en gägäsätzlichi Stadt. Ja meh als mer Erwartät. In Züri isch's Belüchtigskonzeptprojekt vo vor es paar Jahr schlussändlich glaubs uf gad mal ei Brugg aagwändet wordä. Hie in Asuncion händ die meischtä wichtige Gebäude en schöni und durchdachti Belüüchtig i dä Nacht - und s'Huus näbädraa unter Umständ nid vill meh als en Ruinä isch.

Taiwan hed s'Parlamentsgebäude gsponseret heisst's. 50m vom Hauptiigang - en grandiosi Iigang-Zelebrierig in Marmor, Stahl und Glas - fönd d'Holzverschläg vom Slum aa.

---

• Sicherheitsstatistik und Sicherheitsgfühl

Gmäss Statistik söll Asuncion sehr en sicheri Stadt sii, sicherer no als Buenos Aires, wo scho als vorbildlich gilt. Mis Gfühl isch ganz es anders. Und bim Busterminal hani au scho en Eskortä becho, wo die lokalä Lüüt gmeint hend es sig nid schlau am Aabig elei det durezlaufä. So simmer denn z'vierte s'gföhrlichä Stück gloffä.

Mis Gfühl isch wahrschinlich es Resultat vo einersiits dä wenigä Lüüt wo's am Aabig hie no uf dä Strass hed, ab dä 8ne isch zimmli tot und anderersiits dem usserordentlichä Sicherheituufgebot wo immer presänt isch. Nid nur Polizei mit Chnüppel und Pischtolä, sondern auch anderi Lüüt mit Gwehr wo grossi Löcher macht und Militär's wo alli mit aaständigä MGs im Aaschlag umelaufed oder stönd.

Am Namitag hüt schiint en wichtig Person uf de Strass gsii z'sii: 2 Töffs mit Sirene voruus, 3 Jeeps mit je 4 Miltärs mit MGs und offnä Fänschter, en Mercedes mit verdunklätä Schiibä, nomol 3 Jeeps mit Militärs und MGs und 2 Töffs zum Abschliessä. Es mag ja sicher sii hie, aber irgendwie isch das Sicherheitsuufgebot en starchä Kontrascht.